என்விடியா, ஜென்சன் ஹுவாங் மற்றும் சுயாதீன விசாரணை: என்ன நடந்தது, ஏன் உலகம் கவனிக்கிறது?

அறிமுகம்: இந்த விவகாரம் ஏன் உலகளாவிய கவனத்தைப் பெற்றுள்ளது?

என்விடியா நிறுவனத்தின் தலைமை செயல் அதிகாரி சீன உளவாளி என சந்தேகிக்கப்படும் நபரோடு தொடர்பில் இருந்ததாக வெளியான செய்தி உலகம் முழுவதும் அதிர்வலைகளை ஏற்படுத்தியுள்ளது. என்ன நடந்தது? இந்த செய்தி அமெரிக்காவிலும் உலகம் முழுவதும் பெரிதும் பேசப்படுவது ஏன் என்பது குறித்து விளக்கமாக பார்க்கலாம். அமெரிக்காவின் முன்னணி தொழில்நுட்ப நிறுவனமான என்விடியாவின் தலைமை செயல் அதிகாரி ஜென்சன் ஹுவாங் சீன உளவாளி என சந்தேகிக்கப்படும் நபருடன் தொடர்பில் இருந்ததாக செய்திகள் வெளியாகி உள்ளன. அதனைத் தொடர்ந்து அந்த நிறுவனம் சுயாதீன விசாரணையை தொடங்கியுள்ளது.

1. என்ன குற்றச்சாட்டு, என்ன இன்னும் தெரியவில்லை?

என்விடியாவின் தலைமை செயல் அதிகாரி ஜென்சன் ஹுவாங் உடன் நெருங்கிய தொடர்பில் இருந்த சீன தொழிலதிபர் ஆலிஸ் ஹுவாங் சீனாவுக்காக உளவு பார்த்ததாக அமெரிக்க உளவுத்துறை அதிகாரிகள் நம்பினர் என நியூயார்க் டைம்ஸ் வெளியிட்ட செய்தியில் தெரிவிக்கப்பட்டுள்ளது. நியூயார்க் டைம்ஸ் மேற்கோள் காட்டிய பெயர் குறிப்பிடப்படாத வட்டாரங்களின்படி அமெரிக்க உளவுத்துறை அமைப்புகள் ஆலிஸ் ஹுவாங்கை கண்காணித்து வந்தன. அவர் சீன அரசின் சார்பாக செயல்பட்டு வந்ததாக அவை முடிவு செய்திருந்தன.

அப்போது ஆலிஸ் ஹுவாங்கிற்கும் அமெரிக்க குடிமகன் ஒருவருக்கும் இடையே தகவல் தொடர்பு இருந்தது தெரிய வந்ததாக கூறப்படுகிறது. பின்னர் அன்மாஸ்கிங் எனப்படும் நடைமுறையின் மூலம் அந்த அமெரிக்க குடிமகன் ஜென்சன் ஹுவாங் என்பது அடையாளம் காணப்பட்டது.

2. ஹுவாங் என்ன ஒப்புக்கொண்டார், மெகாஸ்பீடு என்ன கூறியது?

இது தொடர்பாக பேசுகையில் தனது மனைவிக்கு துரோகம் இழைத்து விட்டதாக ஒப்புக்கொண்ட ஜென்சன் ஹுவாங் தனது மனைவியையும் குழந்தைகளையும் புண்படுத்தியதற்காக மன்னிப்பும் கோரியுள்ளார். நான் செய்த செயலுக்கு எந்தவிதமான நியாயமும் கற்பிக்க முடியாது. இதற்காக நான் ஆழ்ந்த வருத்தம் தெரிவிக்கிறேன் என்று அவர் கூறியுள்ளார்.

தான் செய்த செயல்களுக்கு முழு பொறுப்பையும் ஏற்பதாக தெரிவித்துள்ள ஜென்சன் ஹுவாங் தனது பொறுப்புகளை சரியாக நிறைவேற்ற தவறிவிட்டதாக என்விடியா நிறுவன ஊழியர்கள் இயக்குனர்கள் குழு மற்றும் பங்குதாரர்களிடம் கூறியுள்ளார். நான் நமது நாட்டையும் நமது நிறுவனத்தையும் நேசிக்கிறேன். என்விடியாவை பாதுகாப்பதிலும் அமெரிக்காவின் தேசிய பாதுகாப்புக்கு ஆதரவளிப்பதிலும் உறுதியாக இருக்கிறேன்.

ஓர் அமெரிக்கராக இருப்பதில் பெருமையும் நன்றி உணர்வும் கொள்கிறேன் என்று அவர் தெரிவித்துள்ளார். சிங்கப்பூரை தளமாகக் கொண்டு செயல்படும் தரவு மைய நிறுவனமான மெகா ஸ்பீடுடன் ஆலிஸ் ஹுவாங் தொடர்புடையவர். கடந்த மாதம் நியூயார்க் டைம்ஸ் நாளிதழிடம் பேசிய அந்த நிறுவனம் தற்போதைய நிர்வாகம் இந்த குற்றச்சாட்டுகளை தீவிரமாக எடுத்துக் கொள்வதாகவும் உள் விசாரணை நடத்த வெளிப்புற சட்ட ஆலோசகர்களை நியமித்துள்ளதாகவும் தெரிவித்தது.

ஹுவாங் லே என்று அழைக்கப்படும் ஆலிஸ் ஹுவாங் சீனாவுக்கு என்ன மாதிரியான தகவல்களை வழங்கியதாக குற்றம் சாட்டப்படுகிறது அந்த தகவல்கள் எந்த அளவுக்கு மதிப்புமிக்கவை அல்லது அவர் எப்போது உளவுத்துறை தகவல்களை சேகரிக்க தொடங்கினார் என்று நம்பப்படுகிறது என்பது இன்னும் தெளிவாக தெரியவில்லை. இது குறித்து கருத்து தெரிவிக்குமாறு நியூயார்க் டைம்ஸ் விடுத்த கோரிக்கைக்கு ஆலிஸ் ஹுவாங் பதிலளிக்கவில்லை.

3. இயக்குனர் குழுவின் சுயாதீன விசாரணை எதை ஆராயும்?

செய்திகளில் எழுப்பப்பட்ட தேசிய பாதுகாப்பு தொடர்பான கவலைகள் குறித்து என்விடியா இயக்குனர் குழு சுயாதீனமான விசாரணையை தொடங்கியுள்ளது. உலகின் மிகவும் மதிப்புமிக்க நிறுவனங்களில் ஒன்றான என்விடியா நிறுவனத்தின் ரகசியங்களோ அல்லது தேசிய பாதுகாப்போ பாதிக்கப்பட்டதாக கருத இயக்குனர் குழுவிடம் எந்த காரணமும் இல்லை என்று தெரிவித்துள்ளது. நிறுவனத்தை தொடர்ந்து வழி நடத்துவதில் அதன் தலைமை செயல் அதிகாரி உறுதியாக இருப்பதாகவும் அது கூறியுள்ளது.

உலகின் மிகப்பெரிய நிறுவனங்களில் ஒன்றான என்விடியா வளர்ந்து வரும் செயற்கை நுண்ணறிவு தொழில்நுட்பங்களுக்கு தேவையான வன்பொருள் என்கிற ஹார்ட்வேரை தயாரிப்பதில் முக்கிய பங்கு வகிக்கிறது. ஜென்சன் ஹுவாங் 30 ஆண்டுகளுக்கும் மேலாக இந்த நிறுவனத்தின் தலைமை பொறுப்பில் இருந்து வருகிறார். என்விடியாவின் இயக்குனர்கள் குழு தனியாக வெளியிட்ட அறிக்கையில் நிறுவனத்தின் நிறுவனர் மற்றும் தலைமை செயல் அதிகாரி ஜென்சன் ஹுவாங் வெளிநாட்டு உளவுத்துறை நடவடிக்கைகளின் இலக்காக இருந்ததாக அண்மையில் வெளியான செய்திகளை கருத்தில் கொண்டு விசாரணையை தொடங்குவதாக தெரிவிக்கப்பட்டுள்ளது.

மேலும் என்விடியா மற்றும் அதன் பங்குதாரர்களின் நலன்களுக்கு மிக முக்கியமானதான அமெரிக்காவின் தேசிய மற்றும் பொருளாதார பாதுகாப்புக்கு இயக்குனர்கள் குழு முன்னுரிமை அளிக்கிறது என்றும் அந்த நிறுவனம் குறிப்பிட்டுள்ளது. கிடைக்கக்கூடிய அனைத்து தகவல்களையும் இந்த விசாரணை ஆராயும் என்றும் குறிப்பிடப்பட்டுள்ளது.

4. H200 சிப்புகள் மற்றும் ஏற்றுமதிக் கட்டுப்பாடுகள் ஏன் முக்கியம்?

அமெரிக்காவுக்கும் சீனாவுக்கும் இடையிலான போட்டியில் என்விடியாவின் செயற்கை நுண்ணறிவு சிப்புகள் முக்கிய கவனத்தை பெற்றுள்ளன. மேலும் அதன் மேம்படுத்தப்பட்ட சிப் தயாரிப்புகளை எந்தெந்த இடங்களில் விற்பனை செய்யலாம் என்பதற்கும் அமெரிக்கா ஏற்கனவே கட்டுப்பாடுகளை விதித்துள்ளது. என்விடியாவின் இரண்டாவது அதிநவீன குறைகடத்தியான H200 சிப் சீனாவின் தொழில்நுட்ப துறைக்கு அமெரிக்காவை விட அதிக முன்னிலை அளித்துவிடும் என்ற கவலை காரணமாக அமெரிக்காவால் ஏற்கனவே விற்பனைக்கு கட்டுப்படுத்தப்பட்டிருந்தது.

கடந்த ஜனவரி மாதம் குறிப்பிட்ட நிபந்தனைகளின் கீழ் சீன வாடிக்கையாளர்களுக்கு H200 சிப்புகளை விற்பனை செய்ய என்விடியா நிறுவனத்தை அனுமதிப்பதாக ட்ரம்ப் நிர்வாகம் தெரிவித்தது.

5. ட்ரம்ப்பின் கருத்துகளும் சீனாவின் மறுப்பும்

விசாரணை குறித்த செய்திகள் வெளியானதிலிருந்து என்விடியா தலைமை செயல் அதிகாரியுடன் தான் பேசவில்லை என்று அமெரிக்க அதிபர் டொனால்ட் ட்ரம்ப் தெரிவித்துள்ளார். அவர் ஒரு சிறந்த மனிதர் என்பது மட்டுமே எனக்கு தெரியும். ஆனால் என்ன நடக்கிறது என்பது உங்களுக்கு தெரியாது என்று செய்தியாளர்களிடம் தெரிவித்த ட்ரம்ப் அவர் நமது நாட்டிற்காக வியக்கத்தக்க வகையில் பணியாற்றி உள்ளார் என்றும் குறிப்பிட்டார்.

கடந்த ஆண்டு சீனாவுக்காக உளவு பார்த்ததாக கூறப்படும் ஆலிஸ் ஹுவாங் குறித்த உளவுத்துறை தகவல்கள் ட்ரம்ப்பிடம் தெரிவிக்கப்பட்டதாக அக்டோபர் மாத இறுதியில் நியூயார்க் டைம்ஸ் செய்தி வெளியிட்டிருந்தது. அப்போது கிடைத்த உளவுத்துறை தகவல்களின் அடிப்படையில் ட்ரம்ப் நடவடிக்கை எடுத்திருக்க வேண்டும் அல்லவா என செய்தியாளர்கள் கேட்டதற்கு இல்லை அப்படி நான் நினைக்கவில்லை. அவர் ஒரு நேர்மையான மனிதர் என்று கருதுகிறேன் என்று ட்ரம்ப் பதிலளித்தார்.

என்விடியா தலைவரை இலக்கு வைத்து உளவு பார்க்கும் நடவடிக்கை நடந்ததாக கூறப்படும் குற்றச்சாட்டுகளை சீனா ஏற்கனவே நிராகரித்துள்ளது. இந்த கூற்றுகளை ஆதாரமற்ற ஊகங்கள் என அது தெரிவித்துள்ளது.

6. என்விடியாவின் வளர்ச்சியும் வணிக விளைவுகளும்

ஜென்சன் ஹுவாங் என்விடியா நிறுவனம் திவாலாகும் நிலைக்கு சென்றபோது ஒன்றுக்கும் மேற்பட்ட முறை அதனை காப்பாற்றியுள்ளார். உலகின் பிற பகுதிகள் செயற்கை நுண்ணறிவின் முக்கியத்துவத்தை உணர்வதற்கு நீண்ட காலத்திற்கு முன்பே அதில் அவர் முதலீடு செய்து ஆபத்துகளை எதிர்கொண்டார். முதலில் கேமிங் பயன்பாட்டிற்காக வடிவமைக்கப்பட்ட என்விடியா சிப்புகளை செயற்கை நுண்ணறிவு மேம்பாட்டிற்கான சிறந்த சிப்புகளாக மாற்ற அவர் எடுத்த முடிவு தற்போது பெரும் பலனை அளித்துள்ளது.

இதன் மூலம் அந்த நிறுவனம் டிரில்லியன் கணக்கான டாலர் மதிப்பை கொண்ட நிறுவனமாக உயர்ந்துள்ளது. இந்த மைக்ரோ சிப் தயாரிப்பு நிறுவனத்தின் மதிப்பு சுமார் 4.5 டிரில்லியன் டாலராக உள்ளது. இதன் மூலம் ஆப்பிள் நிறுவனத்திற்கு அடுத்தபடியாக அதிக மதிப்புமிக்க நிறுவனங்களில் ஒன்றாக என்விடியா திகழ்கிறது.

செயற்கை நுண்ணறிவுக்கான உள்கட்டமைப்பில் என்விடியா முக்கிய பங்கு வகிக்கிறது. ஓபன் ஏஐ மற்றும் மெட்டா உள்ளிட்ட முன்னணி செயற்கை நுண்ணறிவு மாதிரிகளை உருவாக்கும் நிறுவனங்களுக்கு அது சிப்புகளை வழங்குகிறது. பணிக்கு அதிக முக்கியத்துவம் அளிப்பவர் முழுமையான தளத்தை எதிர்பார்ப்பவர் மற்றும் தனது ஊழியர்களிடம் இருந்து மிக உயர்ந்த தரத்திலான பணியை எதிர்பார்ப்பவர் என பெயர் பெற்ற ஜென்சன் ஹுவாங்கிற்கு இது மிகப்பெரிய பின்னடைவு.

முடிவுரை: விசாரணை முடிவுகள் என்ன காட்டும்?

அமெரிக்க தொழில்நுட்ப துறை பங்குகள் சரிந்து மிகவும் மோசமான தருணத்தை எதிர்கொண்டு வரும் நிலையில் இந்த உளவு விவகார சர்ச்சை வந்திருப்பது என்ன பாதிப்புகளை கொண்டு வரும் என்பது போக போகத்தான் தெரிய வரும். இது தொடர்பான விசாரணைகளின் போது என்ன நடக்கும் அதனால் என்விடியா எதிர்கொள்ளும் சவால்கள் என்னவாக இருக்கும் என்பதை பொறுத்திருந்து தான் பார்க்க வேண்டும்.

Powered By K7